Sliman Ɛazem Anidat t Ferɛun

Imeslayen:
Ddunit teɣṣeb tuzzel
Am lebṛaq ay taɛjel
Neḥṣa-tt ur tettdum ara
Ay Agellid a lkamel
Fell-ak kan ay nettkel
Ay aḥnin bab n lqedṛa
Wafeq-aɣ ad nissin laṣel
Mneɛ-aneɣ si lbaṭel
Ddel ur as nezmir ara

Aql-aɣ newhem wer neḥṣi
Yaɛreq ubrid-is ansi
Mi ɣlay win yellan ṛṛxis
Rrakeb turǧa trusi
Xas ma yella yeṭṭef akursi
Achal i iɛeddan qbel-is
Ṛebbi m'ara d-yesteqsi
Labud ad tccud tyersi
Mi iruḥ ad yeɣbu later-is

Ṭuqten wid-nni iɛuṣan
I ttefɣen yak iberḍan
Mi ṛwan aten-yekcem lejhel
Anef ad sɛeddin ussan
Am wigad-nni i ɛeddan
Ruḥen kra din yenḍel
Acḥal yellan d sselṭan
Am lexyalat ay ɛeddan
Mačči kra ad ten-id nessekfel

Seg wasmi i d-yexleq zzman
Lbaṭel-nni i ɛeddan
Dayen ur iqebbel laɛqel
Wid-nni i jehlen qqwan
Ayen-nni qublen ɛennan
Ruḥen d aman n udfel
Fehmet-iyi a wid yeṛǧan
Lḥeq yiwwas ad iban
Ɣer Ṛebbi kulci yeshel

Akka i yaɣ t-id nnan
Yimɣaren-nni iɛeddan
Win ijehlen yettrusu-d
Ma yettu Ṛebbi i s-d-yefkan
Agellid ameqqran
Netta yettcerrif labud
Ɣas ad yili d sselṭan
Ad iqlaɛ seg ẓuran
Am Ferɛun akked Nemṛud