Gağan Khal u Fadikê

Показать описание

Yazan ve Okuyan: Hüseyin Çatal
Muzik: Mikail Aslan

Asma Gağan

Asma Gağan (aralık) asma vêrena Zımıstoniya. Serdo, zımıston êndi amu. Vorê vorena. Rayi wolaxi cêrine. Ez Domon biyo. Vore ke vorêne, ma vêciyene sêre Boni, vore eştenê. Ekê vorêne, nêvinetenê, hata ju metro vorêne. Ma sodir ra vêciyene boni sêr, hata sond vore êştene. Bonu serde hengeme hayleme biyene berj. Hetera ma vorê eştene, hetera vore vorêne, pê made unca sêre boni vorê guretenê.
Ma bê helm mendenê. Va amenê, teyr u türu venge xu nêkerdenê. Milcuku xu eştenê gulika kemeru, yaki xu eştene kulıka desu.
Serd bi, va wusk bi. Mêret ke amenê, gosê ma kerdene cira. Dest paye ma cemediyene. Tu vana pırnıka ma, mara ginêne warro..
Puk dariyenu wu. Maya mı vatene hau unca Puko, xedebo. Piyê mı vatene, haq adire tu wodaro, êndi beso, nu ciko, nu sêne zılmo.
Vayê Yan Curtiyê zaf wusk bi. Piyê mı, hetera vorê eştenê, hetera ki klam vatenê. Sêrd bi, hêni serd bikê, Zimêlone piyê mı cêmed guretenê.
Rozê ke biyene tari, herkes şiyene cêxu. Nonê xu wordenê, ciron şiyenê cê jubin. Ma ya şiyene cê xale mı, cê Memed´e Anuxu, yaki Apê mı Memed´e Gırmıt amêne cê ma. Marê sanik vatenê. Ma xorê gos denê cı. Sewe Zımıston rınd bi. Ez ewru ke sêre örfu u adetone ma sêri tawa zanon, ez ninê Zımıston de muso. Ez ni sanikura muso. Haq va ni pillonê mara raji bo. İnê marê vati, ma gos da cı.
Dersim de Zımıston gırono. Sêwi dergê, xeleşiyane nêzanene. Eke biyene tari, kes têver ra nêmendene. Teyr u Turi ki nêmendene. Vergi, Bizê Kou amêne nejdiye dewe. Amêne cêm de xorê awe simitenê.
Ma xorê şiyene sêyde Zerencu. Vorê ke nerma, xona newe vora, jê toziya. Ma vêrdene dıma zerencu. Zerenc perrenê nat u dot. Xore gefeliyenê, neşkiyene êndi bı perrê, xu êştene zerre vorê, kutenê binê vorê, neşkiyenê bi perrê. Ma ebê dêstu guretene pêy, ardene cê, kerdenê gefes.

Gağan kê biyenê nêjdi, çimê ma rayu ra mendenê. Ma waştenê lingê ravêr va Gağon bero. Xorê sabiyenê.

Asma Gağon de Pillonê ma Gağan viraştenê. Dewa made. Apê Ali bê Apê Musai viraştenê. Ju biyêne Kalik, juki biyêne Fadik ê. Roza Kalu u Fadikê, cimê ma çêverde mendenê. Ma sabiyenê Kal yeno, Fadikê yena çê ma. Hetera sabiyenê, hetere tersenê.
Oda ma kato judê biyê. Nergonê xu tahtê bi. Nêrgon koni bi. Kal ke amenê, hêrbi hêrbi nergonura veciyenê corı. Nergoni têre mordeme kokim gircenê, tu vana xorê binê lingonê Arabu de nalanê.
Ha ayê ki vaci. Kal kokimo. Fadikê Kal ra cenca. Fadikê rindeka. Xorti wazenê Fadike dêste Kal ra biçerê. Firset kê kuti dêst Fadikê remnenê. Codir Kal kê çê be çê fetelia lêwe de arabê xu este. Ni arap riyê xu ebe xızaluku kerdenê şakê, kes inê nasmekero. Dêst de kamci, yaki sopêyi bi. Nêverdene kes bêro nejdiyê Fadikê. Ez arabu ra zaf têrsenê. İkê amene zerrê, mi pê maya xodê xo dardene wu. Kutenê pê pêse maya xu. Eke mı mêvene. Arabu hêrs kerdenê, birrene mara, pêrrene ma sêrı.
Kal oda dê kaykerdene, ginêne warro. Fadikê denê zoniyonê xoro, berbenê. Dêste Kal de guretenê pêyi, dardenê wu. Kal seker, ardi juki ron dene arê. Peydona berdene çê apê Gurm de Xalikê sarayi ye cirê hewla potenê, xorê hewla xu wordenê, ciyo kê mendi, i ki dêne çê apê Gurm tekitene şiyenê. Ez domon biyo, ez têrsene teyi şeri hewla bori.

Ma domon şiyenê çêu ra kağ dêne arê. Ma çê be çê feteliyenê xore gozi, kaği dêne arê. Mı zafer gozu ra haskerdenê. Ez şiyenê çe Xalê usen. Goze inê zaf bi, goz dene ma. Maya mı yarmê hörügu dêne domonu. Apê Nêsimi goz dêne ma. Ma xorê dêane arê, her roz sondê kaykerdenê.
Ju ki a rozê ke çê de xasilê pota, Do kerdo sêri, ron vêrdo sêrı, êndi kêfe amêne hurindi. Cika rindêk verdenê ra sewe ma.
Sondê ma binê Puc kaykerdenê. Pillu ebê peru binê Puc kaykerdenê. Perey binê Puc dê darde wu. Kamkê ju defa de binê puctê pêrey diyene i xorê guretene. Ma domonu ki binê puc kaykerdene, ma goz, kağ, yaki ma gozagi kerdenê binê pucu, hêni kaykerdenê.

Nika nat dot wanon. Vanê Gağan dê hirê rozi rocê çeri no, lokmê kêne vila, sonê mezelu, sonê Jaru. Ez Gağan niya nas nêkon. Mi Gağon niya nêdi.
Mirê hêni yêno ke nı alboz Gağon ra Xızır kêne tê hortê. Asma Xızır ciyo bino. Ma asma Xızır de rocê çênime, son me mezelu, son mê jaru.
Ma de hirê Asmi êste. Gağon, Asma Xızır´i, juki hawta Mal esto. Mado ninê jubinra ca biker me. .
Ma êndi ni töre xu kêrdi xu virra. , xorê bimê xêrib. Milleto kê örf u adetonê xu kêna xu virra, rozê bêno vindi sono. Milêt êbe kulturê xu esto.
Ma Gağan kêrdi xu vırra, Ma Xızır kêrd xu vırra. Ma jarê xu kerdi xu vırra. Domoni na xodê ma citon vozenê siyenê Asporê diyar, citon vorê, puk, xêzep, xêdep nêvatenê, voştenê siyêne qirxleru.
Citon jaru de cilayi vêsnenê.
Ma citon xorê sabiyenê
Gunê ka ma, ma ça xu kerd vırra.