För Ferðaveldisins um Kjöl og Sprengisand.

Hálendishópurinn Ferðaveldið ók og óð urð og grjót upp í mót um 1000 kílómetra leið í gegnum landið þvert og endilangt. Fórum Kjöl til norðurs og svo Sprengisand aftur suður í einhverri þeirri mestu bongóblíðu sem sögur fara af.

Í ferðinni voru þrír ættliðir og tengdarsynir; pabbi, ég og Leon sonur minn, Óli Jón bróðir minn og Jón Kristófer sonur hans, Hlynur sonur Kristínar systur okkar, Helgi mágur okkar og Brynjar tengdarsonur hans. Við tókum þetta nokkuð greitt þar sem ferð hófst kl. 9 á laugardagsmorgni og við vorum svo komnir heim um 7 leytið á sunnudagskvöldi.

Við Leon höfðum aldrei áður farið þessa vegi og var þetta því gríðarleg upplifun og enn ein staðfesting þess hversu einstakt og magnað þetta land okkar er.