Educational Violence - By LycéeEnnasserYouthClub - #LEYC

تضربوني ... بش تعلموني
تهينوني و تقهروني
تكبتوني و تهنتلوني
تعلموني نختار الجهل ... ونحس لي أنا مش أهل!
أهل بش إنّي نتعلّم، إذا كان هذا كلام المعلّم!
خلّيتوني من داخل نتألّم بغُصْتي منجّمش نتكلّمْ
و أنا لي في بالي بش نتعلّم ... ياخي لقيت روحي فيسع مَنْسلّمْ
سنين تعدّات و مشات و أنا على أساس نتعلّم أما في الاخر ما لقيت روحي كان مِسلّمْ:
مسلّمْ في حقي في التّعبير، مسلّمْ في حقي في التفكير، مسلّمْ في حق اختلافي على الغير.

محلاك يا معلّم! كي تبدا ترسم و تعمّر و تشيّد و ترمّم..
محلاها كِتَبْسيمة لحنينة و نظرة العطف و الرّأفة بينا !
أما خسارة هذا شكُنت نستنَّى منك و من لمّيمة كي نغلط و منصيبش الوليمة.
عكس لي تخيلتو صار ! وقتلّي قلتو فاض الكأس و الصّبر طال وكل واحد
على مقياسو اِختارْ... إلّي اِختار الضّرب و إلّي لسانو طال ..
و أنا ملفوق نتفرّج فيكم من البرطال، ناكل في المسبط وكلامكم يتغرس في قلبي كالمسمار...
وهذا على أساس تعلموني كفاش نختار، نطير نجنّح وما نحتارْ؟!
تضربوني ... بش تعلموني وِتْقُولُولِي هيّا اِختار..
تي شبيكْ شصَارْلِكْ يا مِْحتَارْ؟!