Μίμης Τσελεπίδης - Ψαλμόν σ’ εμέτερον τον Δεσπότ’ Παύλον Αποστολίδην

Ψαλμός εις μνήμη του εκλιπόντος μακαριστού Μητροπολίτη Δράμας κ.κ. Παύλου Αποστολίδη.

Άμον πουλίν επέταξες
κι εξέβες σα παρχάρι͜α
Αγγέλ’ έρθαν σην απαντή σ’,
Ρωμαίϊκα παλληκάρι͜α

Πικρά τα δάκρυ͜α έσταξαν
ας σ’ ομμάτι͜α τη μάνα σ’
Βαρέα και λυπητερά
εντούναν τα καμπάνας

Ευλογημένος τη Θεού,
κοιμού αναπαμένος
Ας σ’ όλτς’ εσέν π’ εγνώρτσανε
έσ’νε αγαπεμένος

Τον Πόντον επροσ̌κύνεσες,
χωρία, πολιτείας
και με τα δάκρυ͜α σ’ έγραψες
πατρίδας ιστορίας

Το γένος -ι- σ’ ετίμεσες,
Θεού έργον εποίκες
Σα παιδία, σα εγγόνι͜α ’μουν
ευχ̌ήν, αγάπ’ εφέκες

Τσελεπίδης Θεόδωρος (Μίμης)
Αγροσυκιά Πέλλας 31-5-2022.

[pontioskaitrelos]

Να είστε καλά. Να έχετε την ευχή του γέροντα. Καλό παράδεισο να έχει ο δεσπότης μας ο Λεοντάρη του Πόντου.