ကျင်စန်းကျော့ ယာဥ်ရပ်နားစခန်းကို စစ်တပ် လက်နက်ကြီးနဲ့ပစ်လို့ ကုန်အပြည့်ပါတဲ့ကား ၁၀စီး​ကျော် မီးလောင်

ကျင်စန်းကျော့ ယာဥ်ရပ်နားစခန်းကို စစ်တပ် လက်နက်ကြီးနဲ့ပစ်လို့ ကုန်အပြည့်ပါတဲ့ကား ၁၀ စီးထက်မနည်း မီးလောင်(ရုပ်/သံ)

နိုဝင်ဘာ ၂၃

ရှမ်းပြည်နယ် မြောက်ပိုင်း၊ မူဆယ်မြို့နယ်၊ ကျင်စန်းကျော့ နယ်စပ်ဂိတ်၊ ယာဉ်ရပ်နားစခန်းကို စစ်တပ်က လက်နက်ကြီးနဲ့ ဒီကနေ့ မနက်ပိုင်းမှာ ပစ်ခတ်ရာ ကုန်တင်ကား ၁၀ စီးထက်မနည်း မီးလောင် ပျက်စီးသွားတယ်လို့ ယာဥ်ရပ်နား စခန်းမှာ နေထိုင်သူ တစ်ဦးက မဲခေါင်သတင်းဌာနကို ပြောပါတယ်။
တရုတ်ပြည်ဘက်ကို ပို့မဲ့ ကုန်အပြည့် တင်ဆောင်ထားတဲ့ ကုန်တင်ကား အစီး ၃၀၀ ခန့် ရပ်နားထားတဲ့ ကျင်စန်းကျော့ဂိတ် ယာဉ်ရပ်နားစခန်းထဲ ဒီကနေ့ မနက်ပိုင်းက စစ်တပ်ပစ်တဲ့ လက်နက်ကြီးကျည် ကျရောက် ပေါက်ကွဲခဲ့တာ ဖြစ်တယ်လို့ ဆိုပါတယ်။

"၁၀၅ မိုင်ဘက်က ပစ်တာလို့ ထင်တယ်။ သေချာတော့ မသိဘူးနော်။ ၁၀ ထက်မနည်းဘူး။ အသေးစိတ်က မီးမငြိမ်းတော့မသိသေးဘူး" လို့ သူကရှင်းပြပါတယ်။

လက်ရှိ ကားတွေ မီးလောင်နေဆဲဖြစ်ပြီး ကုန်ကားတွေပေါ်မှာ ပို့ကုန် အပြည့် တင်ထားတာကြောင့် ပျက်စီးဆုံးရှုံးမှု များနိုင်ပြီး ခန့်မှန်း ကျပ်ထောင်ပါင်းများစွာ ဆုံးရှုံးနိုင်တယ်လို့ ဆိုပါတယ်။

လတ်တလော မီးသတ်ကားတွေ ရောက်ရှိ ငြိမ်းသတ်နေပြီဖြစ်လို့ မကြာခင် မီးငြိမ်းသွားနိုင်ပြီး ကားအများစု ကတော့ ပြင်ပကို မောင်းထွက်သွားနိုင် ပေမယ့် ယာဥ်မောင်းနဲ့ ကားသော့မရှိတဲ့ ကားတွေ ကျန်နေသေးတယ်လို့ ဒေသခံ တစ်ဦးက ပြောပါတယ်။

စစ်ကောင်စီက ကားတွေကို မောင်းထွက်ခွင့် ပြုနေပေမယ့် အပြင်လူတွေ ကျင်စန်းကျော့ဂိတ်ထဲ လုံးဝ ဝင်ခွင့်မပေးတော့ဘဲ ပိတ်ဆို့ထားတယ်လို့ သိရပါတယ်။