АРДЫН ДУУЧ Б.АЛТАНЖАРГАЛ: АРДЫН ДУУ СЭРҮҮЛЭГ ШИГ, ТАШУУР ШИГ САНАХ СЭРЭХ БҮХНИЙГ ӨГДӨГ

ТЭР буландаа бид ардын дууч Б.Алтанжаргалыг урьж ярилцлаа. Тэрээр Анхны тоглолтоо 2018 онд хийж, “хожуу” уран бүтээлээ туурвиж байгаа ч мэргэжлийн дуучин билээ. Ардын дуу сэрүүлэг, ташуур шиг санах сэрэх бүхнийг өгдөг. Яндашгүй их далай гэсээр бидний яриа эхэлсэн юм.

Ардын дуу сургаал шиг, бас амьдралын их өрнөл байдаг

Миний хувьд хэлж ярьж, үлгэр жишээ авахад маань өдөр бүр сануулж байдаг сэрүүлэг мэт авч явдаг Монгол ардын богино дуу “Сандуйтай мод” юм. Залуу байгаа цаг хугацаандаа эрчимтэй урагшаа тэмүүлж ажилла гэсэн ташуур үг шиг санагддаг.

Сандуйтай мод

Сандуйтай юу мод нь болбол сар нарны чимэгээ хө

Сайн явдал саруул ухаан энэ биений чимэг ээ хө хө

Сайхан чиг төрсөн залуухан тэр минь ээ

Санаж явсан миний биений зүрхний минь чимэгээ хө хө

Навчтай юу мод нь болбол нар сарны чимэг ээ хө хө

Насны багад эрдмийг сурах энэ биений чимэг ээ хө хө

Найртай чиг төрсөн залуухан тэр минь ээ

Найдаж явсан миний биений зүрхний минь чимэгээ хө хө

Галууны маань дэгдээхий нь болбол

Ганганаад нисэхээрээ хө

Ганга мөрний усыг болвол гатлаад гарна аа хө хө

Ганьхан чиг төрсөн Оюунсамдангаа хө хө

Газар усны найман зовхис нь дагаад мордвоо хө хө

Та цагаан сарын баяр тэмдэглэдэг үү? Орчин цагт залуус тэмдэглэх нь бага байх шиг.

Манай үндэсний хоёр том баярын нэг нь цагаан сар, нөгөө нь наадам. Өтгөс бууралдаа мэнд мэдэх, ах дүүстэйгээ биеийн сайныг мэдэлцэх хамгийн сайхан баяр. Айл өрх бүр гэртээ идээ будаа засдаг. Энэ нь хүний тэгш дүүрэн байхын бэлгэдэл болж өгдөг. Залуу гэр бүл, цагаан сараа тэмдэглэдэг. Энэ бол өвөө эмээгийн маань захиас. Бид бүгд бахархах ёстой баяр гэж хүлээн авдаг.