Эрдўғон намойишчиларни Тақсим майдонини тарк этишга чақирди

Туркия Бош вазири Ражаб Тоййиб Эрдўғон аксилҳукумат намойишчиларини Истанбулнинг Тақсим майдонини тинч тарк этишга чақирди. Эрдўғон ҳукуматга қарши уюштирилаётган намойишлар тўлқинини Туркиянинг обрўси ва иқтисодиётига зарар етказиш режасининг бир қисми, дея атади. Сешанба куни полиция намойишчиларни Тақсим майдонидан сиқиб чиқаришга киришди.

Туркия Бош вазири Ражаб Тоййиб Эрдўғон қарийб икки ҳафта олдин Истанбулда бошланган норозилик намойишларидан ғаразгўй одамлар ўз сиёсий мақсадлари йўлида фойдаланмоқда, дея иддао қилди.

Сешанба куни пойтахт Анқарада депутатлар олдида сўзлаган Эрдўғон ҳукуматга қарши намойишларни Туркия обрўсига путур етказиш ҳақидаги режанинг бир қисми, деб баҳолади.

Чоршанба куни Эрдўғон аксилҳукумат намойишлари иштирокчилари билан учрашиши кутилмоқда.